Contoh Pambagyaharja ing Acara Halal Bihalal

Assalamu’alaikum wr wb

           Kawilujengan karaharjan berkah saha rakhmad kagunganipun Gusti Ingkang Maha mirah, mugi tansah lumintu, lumintir, kajiwa kasalira dhumateng panjenengan sedaya dalasan kula sumrambah kulawarga waradin sagung dumadi, widada niskala lulus raharja

Ø Para ,sesepuh saha pinisepuh, ingkang hanggung mestuti dhumateng pepoyaning kautaman

Ø para alim, para ulama ingkang tansah cinaketan ing reh kautamaning budi kinuntunan mring kitab suci ingkang tansah kula mulyaakan saha ingkang tuhu kinabekten

Ø maggalaning praja satriya pangembating nagari ingkang tuhu berbudi bawa leksana,

Ø Para pangarsa Organisasi kemasyarakatan ingkang kinurmatan

Ø Pangarsa Permadani Kabupaten Wonosobo ingkang lebda ing pitutur,

Ø para kadang mudha madya werda saha keluwarga agung permadani Kabupaten Wonosobo ingkang sinangkeban talining pasedherekan bhineka tunggal ika, tanhama darma mangrowa, ingkang bagya lan mulya

Ø para rawuh kakung sumawana putri ingkang tansah sinugata sagunging kaurmatan,

Nglenggana bilih panjenengan lan kula jejering titah sawantah jalma manungsa limrah ingkang tansah kapurba kawesa dining gusti ingkang maha wikan sumangga kula dherekaken hangonjukaken puja pudyastawa sahandhap pepadaning Gusti Ingkang Maha Agung, ingkang saking keparengipun ing ari kalenggahan menika saged kempal manunggal kanthi widada kalis ing sakehing durgama, wilujeng rahayu, inggih awit saking menika minangka wedharing raos syukur kanthi pangucap  “Alhamdulillahirabbil ‘alamin”

Shalawat saha salam dalah karahayon mugi tansah lumeber dhumateng priyagung paunggulaning manungsa mustikaning bawana, Nabi agung, Rasulullah Muhammad S.A.W dalah kaluarga sumrambah para sahabat, ,sagung pandherek kalebet panjenengan sedaya dalasan kula ingkang tansah hangantu songsong pangayomaning fiddunya wal akhirah. Amin

Sakderengipun nglajengaken atur, kaparenga ngaturaken takoballohu mina waminkum Minal ‘aidin wal faidzin,.

Salajengipun kula nyuwun ing deduka tinebihna ing tolak balik, Kula cumanthaka ngadeg ngabyantara matur wonten ngarsa panjenengan sedaya satemah anggempil kamerdhikan nyahak wewenang nyigeg sawetasis anggen panjengenan eca sekeca wawan sabda, awit ing kalenggahan menika kula minangka raga sambeting wicara talanging basa, para panawung kridha, .ngaturaken pambagya harja sugeng rawuh sugeng lenggah kanthi suka merdhikaning penggalih ngantos paripurnaning adicara ing mangke, saha boten kesupen ngaturaken gunging panuwun ingkang tanpa winates, dene panjenengan sedaya priyagung ingkang tansah kabujung ing bot repoting bebrayan agung, saha kaliput ing sarwining pakaryan, parandene  tasih kepareng mirunggaaken  wekdal ngrawuhi wontenipun  ing adicara menika,

Sagung para rawuh kakung sumawana putri ingkang dhahat kinurmatan.

Dene awit paring idi pangestu saking panjenengan sedaya adicara punika saged kaleksanan kanthi widada nirbaya nir wikala.

Sagung Para rawuh ingkang sinugata sagunging kaurmatan,

Estunipun tumapaking gati adicara ing siang punika saged kaleksanan kanthi rancak jumbuh ingkang ginayuh, .sembada ingkang sinedya, sayekti ingkang kaesti, mboten sanes inggih awit saking panyengkuyung para kadang, ugi warga permadani, ingkang arupi bandha beya bau suku miwah iguh pratikel twin sapiturutipun, ingkang mboten saged kasebat setunggal mboko setunggal, satemah saged damel rancaking adicara wiwit purwa, madya dumugining ndhata ing wekdal punika,  saking menika kula minangka sulih saking kadang panawung kridha ngaturaken agunging panuwun ingkang tanpa pepindhan mugi-mugi paring pambiyantu panjenengan sedaya kacathet minangka ngamal ngibadah saha nampi piwales ingkang timbang destun hanglangkungana.

Ing mangke katur dhumateng pangarsa permadani Kabupaten Wonosobo saha Kepala Dinas Pariwisata dan Kebudayaan Kabupaten Wonosobo kasuwun kersa paring pangandikan utawi medhar sabda ing adicara punika.

Para tamu ingkang kinurmatan

Kula sakadang namung jejering titah sawantah jalma limprah ingkang winates salwiring panjangkah satemah dumugining adicara punika tasih kantha khithal kuciwanipun utaminipun ingkang sambet titrah panampining panjenengan sedaya ingkang lirang tata karma saha sanesipun sedaya kalau wau kula sakadang namung saged nyadong.nyuwun rumentahing samudra pangaksami.

Semanten ugi ingkang tinandhuk wonten jasad kula minangka raga sambeting wicara para kadang panawung kridha jejering kula tiyang ingkang kirang ing seserepan miwah asor ing samukawis, kirang jangkeping pamatur kula kanthah ingkang nalingsir ing paugeran, miwah kirang suba sita anggen kula lumarap atur, ingkang tan bangkit mangun suka reraning penggalih sagung para rawuh kakung sumawana putri,  kanthi andhap asoring manah mugi kepareng panjenengan mbedhahna telenging samodra hanyempyakna tirta pangaksami dateng jasad kula.

Tebak siti wohing dami   biinungkus roning klapa Kula tansah hanglenggana apuranto sedaya lepat kawula, Minangka puput pepet pepunthoning atur, kepareng kula memuja puji mandarmaning sesanti, gangga gangga tri gangga  durga mendhak kala sirna, hamung widada mulya ingkang tansah kinanthiya

            Wasana “ Ihdinassiratalmustaqim, wabillahitaufik walhidayah, wassalamu’alaikum wr.wb.”