PAMBAGYAHARJA KHITAN + KHATAMAN QURAN

Assalamu’alaikum wr wb

           Kawilujengan karaharjan berkah saha rakhmad kagunganipun Gusti Ingkang Maha mirah, mugi tansah lumintu, lumintir, kajiwa kasalira dhumateng panjenengan sedaya dalasan kula sumrambah kulawarga waradin sagung dumadi, widada niskala lulus raharja

Ø Para ,sesepuh saha pinisepuh, ingkang hanggung mestuti dhumateng pepoyaning kautaman

Ø para alim, para ulama ingkang tansah cinaketan ing reh kautamaning budi kinuntunan mring kitab suci Langkung-langkung wonten ngarsanipun almukharam Bapa Kyai Toha  ingkang tansah kula dhereki menggah sabdatamanipun  saha ingkang tuhu kinabekten

Ø Para Ustad saha ustadzah ingkang sinugata ing kautmatan

Ø Pangemban pangembat praja mliginipun dhumateng bapa Muzamil, ingkang pantes sinudarsana

Ø para kadang mudha madya werda saha panawung kridha darma ingkang sinangkeban talining pasedherekan bhineka tunggal ika, tanhama darma mangrowa, ingkang kinurmatan

Ø para rawuh kakung sumawana putri ingkang tansah sinugata sagunging kaurmatan,

Nglenggana bilih panjenengan lan kula jejering titah sawantah jalma limrah ingkang tansah kapurba kawesa dining gusti ingkang maha wikan sumangga kula dherekaken hangonjukaken puja pudyastawa sahandhap pepadaning Gusti Ingkang Maha Agung, ingkang saking keparengipun dalu kalenggahan menika saged kempal manunggal angestreni tumapaking gati Khataman Quran punika, kanthi widada kalis ing sakehing durgama, wilujeng rahayu, inggih awit saking menika minangka wedharing raos syukur kanthi pangucap  “Alhamdulillahirabbil ‘alamin”

Shalawat saha salam dalah karahayon mugi tansah lumeber dhumateng priyagung paunggulaning manungsa mustikaning bawana, Nabi agung, nabi pepunthoning zaman nun inggih Rasulullah Muhammad S.A.W dalah kaluarga sumrambah para sahabat, ,sagung pandherek kalebet panjenengan sedaya dalasan kula ingkang tansah hangantu songsong pangayomaning fiddunya wal akhirah. Amin

Salajengipun kula nyuwun ing deduka tinebihna ing tolak balik, Kula cumanthaka ngadeg ngabyantara matur wonten ngarsa panjenengan sedaya satemah anggempil kamerdhikan nyahak wewenang nyigeg sawetasis anggen panjengenan eca sekeca wawan sabda, awit mundhi dhawuh tinimbalanipun bapa Sukur Mardiono ing kalenggahan menika kula kapiji kanthi minangka raga sambeting wicara talanging basa, panjenenganipun BpSukur Mardiono.ngaturaken pambagya harja sugeng rawuh.

Mboten karana panjenenganipun Sukur Sumardi kirang wasis ngracik basa twin sastra, namung awit saking bombong, mongkog birawaning manah,  nampi rawuh panjenengan sedaya saha nampi paringipun sih katresnan miwah sih kadarman ingkang arupi punapa kemawon,  sedaya sabda pangandikanipun ingkang sampun karancang kaenamnam ngantos kathirik –thirik. Sedaya boten kawijil ing lesan, namung kandheg ing  kathiking jangga tembeng-tembeng ing telenging wardaya, senadyan saklimah kemawon ewa mboten kawawa ngenandika, setemah namung sedhakep anungku jangga, legeg-legeg kadya tugu sinukarta.

Karana ing mriki kula minangka sulih salira saking kadang kula pun Sukur MArdiono ingkang sepisan ngaturaken sugeng rawuh panjenengan sedaya, sugeng lenggah kanthi suka merdhikaning penggalih ngantos paripurnaning Khataman Quran ing mangke, saha boten kesupen ngaturaken gunging panuwun ingkang tanpa winates, dene panjenengan sedaya priyagung ingkang tansah kabujung ing bot repoting pebrayan agung, saha kaliput ing sarwining pakaryan, parandene  sinaosa ndalu tasih kepareng mirunggaaken  wekdal ngrawuhi wontenipun  adicara menika,

Sagung para tamu baraya agung ing laladan madukoro ingkang dhahat kinurmatan.

Kados sampun kacetha wonten ing sedhahan punapa lumantar para kadang panawung kridha ingkang ngabyantara  sowan wonten dalem panjenengan sowang sowang, bilih ing wekdal punika Bapa Sukur Mardiono asung netepi darmaning asepuh ngislamaken saha khitanaken atmaja kakungipun asesilih anak mas        Arfan Zalafi Mahdi. Kasuwun ing mangke Bapa Kyai Toha kersaha Ngislamaken Nak Mas Argan Zalafi Mahdi Wondene khitanan badhe kaleksanan titi wanci ari enjang  surya kaping 7 wulan Mei .warsa  1013 mapan wonten . . . . . . .

Saking menika panjengenan sedaya kasuwun rawuh ing dalu menika mboten sanes kasuwun hanyekseni anggenipun maos sahadad minangka tandha leres-leres sampun Islam saestu, saha nyuwun doa pangestu mugi-mugi ing mangke ugi khitan ing mangke kaleksanan kanti widada nirbaya nir wikala. Lan salajengipun nak mas Arfan Zalafi Mahdi anggenipun wonten pabrayan , wiwit purwa madya dumugining wasana tansah manggih bagya mulya tinebihna ing rubeda kalis ing sambikala, tansah setya mituhu saha bekti dumateng tiyang sepuhipun, ugi gurunipun migunani tumrap  Agama, nusa lan bangsa.

Sagung Para tamu ingkang sinugata sagunging kaurmatan,

Estunipun tumapaking gati upacara khataman ing dalu punika saged kaleksanan kanthi rancak jumbuh ingkang ginayuh, .sembada ingkang sinedya, sayekti ingkang kaesti, mboten sanes inggih awit saking panyengkuyung para kadang, sanak rowang miwah tanggi tepalih, ingkang arupi bandha beya bau suku miwah iguh pratikel twin sapiturutipun, ingkang mboten saged kasebat setunggal mboko setunggal, satemah saged damel rancaking adicara wiwit purwa, madya dumugining ndhata ing wekdal punika,  saking menika panjenenganipun bapa Sukur Mardiono ngaturaken agunging panuwun ingkang tanpa pepindhan,  mboten katalompen bapa Sukur MArdiono ngaturaken gunging panuwin ingkat tanpa winates dumateng para Ustad saha ustadzah ingkang sampun hangggulawentah putranipun satemah ing ndata saged khatam Quran menika. Bapa Sukur Mardiono mboten saged atur piwales ingkang jumbuh kaliyan paring pambiyantu panjenengan sedaya, namung kanthi panggrantesing manah nyuwun dhumateng ngarsa dalem gusti ingkang maha agung mugi-mugi paring pambiyantu saha panggulkowentah panjenengan sedaya kacathet minangka ngamal ngibadah saha nampi piwales ingkang timbang sukur hanglangkungana.

Para tamu ingkang kinurmatan

Estunipun sampun sawatawis dangu anggenipun bapa Sukur Mardiono anggenipun ngarancang angenamnam murih titilaksana ing dalu menika mboten nguciwani para tamu, parandene bapa Sukur Mardiono  namung jejering titah sawantah jalma limprah ingkang winates salwiring panjangkah satemah dumugining ndhata tasih kantha khithal kuciwanipun utaminipun ingkang sambet titrah kaliyan panampining tamu inggih boja  krama lan sasana. Boja ateges  atur pasedahan ingkang kirang miraos, mboten jumbuh kaliyan palenggahan panjenengan sedaya. Krama,  subasitaning para kadang among tamu ambembaga ingkang nilar deduga lan prayoga satemah hanggempil kamardhikan panjenengan sedaya, wondene Sasana ateges papan ingkang sawetawis cupat kapara panjenengan dipun lenggahaken wonten pelataran njawi, sedaya kalau wau panjenenganipun bapa Sukur Sumardi namung saged nyadhong.nyuwun rumentahing samudra pangaksami.

Semanten ugi ingkang tinandhuk wonten jasad kula minangka raga sambeting wicara Bapa Sukur Sumardi.,jejering kula tiyang ingkang kirang ing seserepan, kirang jangkeping pamatur kula kanthah ingkang nalingsir ing paugeran, miwah kirang suba sita anggen kula lumarap atur, ingkang tan bangkit mangun suka reraning penggalih sagung para tamu,  kanthi andhap asoring manah mugi kepareng panjenengan mbedhahna telenging samodra hanyempyakna tirta pangaksami dateng jasad kula.

Tebak siti wohing dami   biinungkus roning klapa Kula tansah hanglenggana apuranto sedaya lepat kawula, Minangka puput pepet pepunthoning atur, kepareng kula memuja puji mandarmaning sesanti, gangga gangga tri gangga  durga mendhak kala sirna, hamung widada mulya ingkang tansah kinanthiya

            Wasana “ Ihdinassiratalmustaqim, wabillahitaufik walhidayah, wassalamu’alaikum wr.wb.”