PAMBAGYAHARJA TANGGAP WARSA

Assalamu’alaikum wr wb

           Kawelasan sih saking Gusti Ingkang Maha welas maha asih, mugi tansah lumintu, lumintir, kajiwa kasalira dhumateng panjenengan sedaya dalasan kula sumrambah kulawarga, widada niskala lulus raharja

Ø Para ,sesepuh saha pinisepuh, ingkang hanggung mestuti dhumateng pepoyaning kautaman, para alim, para ulama ingkang tuhu kinabekten

Ø Bapak Ibu Guru ingkang tansah memardi mring mardawaning ngelmu ingkang kinurmatan

Ø para kadang mudha madya werda ingkang cinaket ing manah

Ø para rawuh kakung sumawana putri ingkang kula mulyaaken

Nglenggana bilih panjenengan lan kula jejering titah sawantah jalma limrah ingkang tansah kapurba kawesa dining gusti ingkang maha wikan sumangga kula dherekaken hangonjukaken puja puji syukur wonten ngarsa Allah, ingkang saking keparengipun ing kalenggahan menika panjenengan lan kula saged kempal manunggal angestreni pahargyan tanggap warsanipun Mas. . . . .. . . . punika, kanthi widada kalis ing rubeda, wilujeng rahayu, inggih awit saking menika minangka wedharing raos syukur kanthi pangucap  “Alhamdulillahirabbil ‘alamin”

Salajengipun kula nyuwun ing deduka tinebihna ing tolak balik, Kula cumanthaka ngadeg ngabyantara matur wonten ngarsa panjenengan sedaya satemah nggempil kamerdhikan, nyigeg sawetasis anggen panjengenan eca sekeca wawan sabda, awit mundhi dhawuh tinimbalanipun Mas. . . . . . .. . ing kalenggahan menika kula kapiji kanthi minangka  talanging basa, panjenenganipun mas.  . . . . . .. . .ngaturaken pambagya harja sugeng rawuh..

Kula minangka sulih salira mas . . . . .. . . . ingkang sepisan ngaturaken sugeng rawuh panjenengan sedaya, sugeng lenggah kanthi suka merdhikaning penggalih ngantos paripurnaning pawiwahan ing mangke, saha boten kesupen ngaturaken gunging panuwun ingkang tanpa winates, dene panjenengan sedaya tasih kepareng mirunggaaken  wekdal ngrawuhi wontenipun  ing pahargyan menika,

Sagung para rawuh kakung sumawana putri ingkang dhahat kinurmatan.

mas . . . . . . .. . . kaleres ing dinten menika minangka dinten tanggap warsanipun ingkang kaping . . . . . .

. Saking menika panjengenan sedaya kasuwun rawuh ing pahargyan ing siang menika mboten sanes kasuwun idi pangestunipun mugi-mugi Mas. . . . . . .anggenipun arsa lelumban ing samudraning bebrayan wiwit purwa madya dumugining wasana tansah manggih bagya mulya tinebihna ing rubeda kalis ing sambikala, tansah jumbuh ingkang ginayuh. pinaringan rejeki ingkang halalan toyiban,  

Sagung Para rawuh ingkang sinugata sagunging kaurmatan,

Para tamu ingkang kinurmatan

Mas. . . . . . .tansah nyuwun pangaksami awit saking panampining tamu kirang tata krami, kalenggahan ingkang mboten sekeca, saha sugata ingkang kirang miraos, mboten jumbuh kaliyan palenggahan panjenengan sedaya kala wau panjenenganipun mas .. . . . .. . . namung saged nyadong.nyuwun rumentahing samudra pangaksami.

Semanten ugi ingkang tinandhuk wonten kula minangka raga sambeting wicara mas  . . . .. . . . .,jejering kula tiyang ingkang cubluk ambelilu, kothong ing seserepan miwah asor ing samukawis, kirang jangkeping pamatur kula kanthah ingkang nalingsir ing paugeran, miwah kirang suba sita anggen kula lumarap atur, ingkang tan bangkit mangun suka reraning penggalih sagung para rawuh kakung sumawana putri,  kanthi andhap asoring manah mugi kepareng panjenengan maringi pangaksami dateng kula.

Tebak siti wohing dami   biinungkus roning klapa apuranta sedaya lepat kawula, Minangka pepunthoning atur, kepareng kula memuja puji mandarmaning sesanti, gangga gangga tri gangga  durga mendhak kala sirna, hamung widada mulya ingkang tansah kinanthiya

            Wasana “ Ihdinassiratalmustaqim, wabillahitaufik walhidayah, wassalamu’alaikum wr.wb.”